जत तालुक्यात साळमळगेवाडीत घराला आग, सिद्धनाथ येथे महिला रेशन दुकानदाराचा जातीवाचक अपमान, गोंधळेवाडीत ४.४८ लाखांची चोरी; अंकलगीत १००१ दिवे लावून काळी दिवाळी.
जत : जत तालुक्यात गेल्या काही दिवसांत गुन्हेगारीच्या तीन वेगवेगळ्या घटना घडल्या आहेत. साळमळगेवाडी येथे घरातील सदस्यांना बाहेर काढून घराला आग लावण्यात आली. सिद्धनाथ येथे रेशनकार्ड बंद झाल्याच्या रागातून महिला रेशन दुकानदार व तिच्या मुलाला जातीवाचक शिवीगाळ करून जीवे मारण्याची धमकी देण्यात आली. तर गोंधळेवाडी येथे बंद घराचे कुलूप तोडून चोरट्यांनी सुमारे साडेचार लाख रुपयांचा मुद्देमाल लंपास केला. दरम्यान, अंकलगी येथे पाण्याच्या प्रश्नाकडे प्रशासनाचे लक्ष वेधण्यासाठी ग्रामस्थांनी कोरड्या तलावात १००१ दिवे लावून काळी दिवाळी साजरी केली.
साळमळगेवाडीत घराला आग; संसारोपयोगी साहित्य जळून खाक
साळमळगेवाडी (ता. जत) येथे घरातील महिलांसह कुटुंबीयांना घराबाहेर काढून शिवीगाळ करत घराला आग लावल्याची घटना घडली. या आगीत घरातील महत्त्वाची कागदपत्रे, इलेक्ट्रॉनिक साहित्य आणि संसारोपयोगी वस्तू जळून नुकसान झाले. ९ नोव्हेंबर रोजी सायंकाळी साडेसातच्या सुमारास हा प्रकार घडला.
याबाबत सर्फराज बाबासाहेब शेख (वय ३४, व्यवसाय शेती) यांनी जत पोलिस ठाण्यात फिर्याद दिली आहे. त्यानुसार साबिर बाबासाहेब शेख (वय २९, रा. साळमळगेवाडी) याच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी कामानिमित्त घराबाहेर गेले असताना संशयिताने फिर्यादीची पत्नी रेश्मा, स्वतःची पत्नी शारिना आणि घरातील इतर सदस्यांना घराबाहेर काढून शिवीगाळ केली. त्यानंतर घराला आग लावून घरातील साहित्य जाळल्याचे फिर्यादीत म्हटले आहे. या घटनेचा पुढील तपास जत पोलिस करत आहेत.
रेशनकार्ड बंद केल्याच्या रागातून महिला दुकानदाराचा जातीवाचक अपमान
सिद्धनाथ (ता. जत) येथे रेशनकार्ड बंद झाल्याच्या कारणावरून महिला रेशन दुकानदार आणि तिच्या मुलाला अश्लील व जातीवाचक शिवीगाळ करून जीवे मारण्याची धमकी दिल्याची घटना घडली. याप्रकरणी जत पोलिस ठाण्यात ॲट्रॉसिटीसह विविध कलमान्वये गुन्हा दाखल करण्यात आला आहे.
याबाबत संबंधित महिलेने फिर्याद दिली असून विलास ज्ञानू करे (रा. शिंदे वस्ती, सिद्धनाथ) असे संशयिताचे नाव आहे.
पोलिसांनी दिलेल्या माहितीनुसार, ९ नोव्हेंबर रोजी रात्री अडीचच्या सुमारास सिद्धनाथ येथील आकाश सिद्ध नापीक यांच्या दुकानाजवळ हा प्रकार घडला. रेशनकार्ड बंद झाल्याच्या कारणावरून संशयिताने फिर्यादीच्या मुलाला आणि फिर्यादी महिलेला उद्देशून आक्षेपार्ह व जातीवाचक वक्तव्ये केली.
वाद वाढू नये म्हणून महिलेने आपल्या मुलाला घरी आणले. त्यानंतर मुलाने घडलेला प्रकार आईला सांगितला. संशयिताने अन्य एका व्यक्तीसमोरही फिर्यादी महिलेचे नाव घेऊन अपमानास्पद वक्तव्य केले आणि दुसऱ्या दिवशी उजाडण्यापूर्वी जीवे मारण्याची धमकी दिल्याचे फिर्यादीत नमूद आहे.
हेदेखील वाचा : जतच्या डॉ. गायत्री जावीर यांची स्त्रीरोगतज्ज्ञ वैद्यकीय अधिकारी वर्ग-1 पदी नियुक्ती
गोंधळेवाडीत बंद घर फोडले; साडेचार लाखांचा मुद्देमाल लंपास
गोंधळेवाडी (ता. जत) येथे बंद घराचे कुलूप आणि कडी-कोयंडा तोडून चोरट्यांनी सोन्याचे दागिने, रोख रक्कम आणि तांब्या-पितळेची भांडी असा एकूण ४ लाख ४८ हजार ४०० रुपयांचा मुद्देमाल चोरून नेला. ४ ते ९ नोव्हेंबरदरम्यान ही चोरी झाली.
याबाबत विजया अण्णासाहेब धुमाळ (वय ६५, रा. बागडेबाबा मंगल कार्यालयाजवळ, गोंधळेवाडी) यांनी उमदी पोलिस ठाण्यात फिर्याद दिली आहे.
चोरट्यांनी घराचे कुलूप तोडून आत प्रवेश केला. त्यानंतर दोन तोळ्यांचे मंगळसूत्र, सोन्याची बोरमाळ, दोन तोळ्यांचा लक्ष्मीहार, तीन तोळ्यांचे गठण, एक तोळ्याची कर्णफुले, सोन्याची चेन, रोख रक्कम तसेच तांब्या-पितळेची भांडी चोरून नेली. या घटनेमुळे परिसरात खळबळ उडाली असून उमदी पोलिस पुढील तपास करत आहेत.
कोरड्या तलावात १००१ दिवे लावून काळी दिवाळी; पाण्यासाठी तीव्र आंदोलनाचा इशारा
जत तालुक्यातील अंकलगी येथे पाण्याच्या प्रश्नाकडे प्रशासनाचे लक्ष वेधण्यासाठी ग्रामस्थांनी अनोख्या पद्धतीने निषेध नोंदवला. गावातील कोरड्या पडलेल्या तलावात १००१ दिवे लावून ग्रामस्थांनी काळी दिवाळी साजरी केली. पाणी योजनांवर कोट्यवधी रुपये खर्च होऊनही तलाव कोरडेच असल्याने ग्रामस्थांनी प्रशासनाविरोधात संताप व्यक्त केला.
गुड्डापूर, व्हसपेठ, संख आणि अंकलगी या गावांसाठी सुमारे २६ कोटी रुपयांचा निधी खर्च करण्यात आला आहे. मात्र, संबंधित तलावांमध्ये अद्याप पाणी सोडण्यात आलेले नाही, असा आरोप ग्रामस्थांनी केला.
संत बागेबाबा पाणी संघर्ष समिती, अंकलगी, पुणे फ्रेंड्स मंडळ तसेच विविध संघटनांचे पदाधिकारी आणि ग्रामस्थ या आंदोलनात सहभागी झाले होते.
पाण्याचा प्रश्न तातडीने मार्गी न लावल्यास याच कोरड्या तलावात तीव्र उपोषण करण्यात येईल, असा इशारा तुकाराम महाराज यांनी दिला. पाण्यासाठी ग्रामस्थांनी साजरी केलेली ही काळी दिवाळी प्रशासनाच्या कार्यपद्धतीवर प्रश्नचिन्ह उपस्थित करणारी ठरली आहे. (जत तालुक्यात चार वेगवेगळ्या घटना)