जत तालुक्यातील तीन महत्त्वाच्या बातम्या. वळसंगमध्ये ट्रॅक्टर उलटून माजी सैनिकाचा मृत्यू, सहा महिला मजूर जखमी; आमदार गोपीचंद पडळकर यांच्या विजयाचा जत शहरात जल्लोष; डफळापुरात व्यापारी सहकारी पतसंस्था सुरू.
जत : जत तालुक्यात मंगळवारी तीन महत्त्वाच्या घडामोडी घडल्या. वळसंग येथे शेतमजुरांना घेऊन जाणारा ट्रॅक्टर उलटल्याने माजी सैनिकाचा जागीच मृत्यू झाला, तर सहा महिला मजूर जखमी झाल्या. दुसरीकडे, जिल्हा मध्यवर्ती सहकारी बँकेच्या निवडणुकीत आमदार गोपीचंद पडळकर यांच्या विजयाचा समर्थकांनी शहरात जल्लोष केला. दरम्यान, डफळापूर येथे व्यापाऱ्यांसाठी नव्या सहकारी पतसंस्थेचे उद्घाटन उत्साहात पार पडले.
वळसंगमध्ये ट्रॅक्टर उलटून माजी सैनिकाचा मृत्यू; सहा महिला मजूर जखमी
जत : वळसंग (ता. जत) येथे शेतातील कामासाठी महिला मजुरांना घेऊन जाणारा ट्रॅक्टर उलटून झालेल्या भीषण अपघातात माजी सैनिकाचा जागीच मृत्यू झाला, तर सहा महिला मजूर जखमी झाल्या. यातील दोघींची प्रकृती गंभीर असून त्यांच्यावर सांगली येथील शासकीय रुग्णालयात उपचार सुरू आहेत.
सुरेश निवृत्ती चव्हाण (वय ५५, रा. वळसंग) असे मृताचे नाव आहे. मंगळवारी सकाळी साडेआठच्या सुमारास वळसंग-काराजनगी रस्त्यावरील त्यांच्या शेतात ही दुर्घटना घडली.
पोलिसांनी दिलेल्या माहितीनुसार, चव्हाण हे मक्याची रास करण्यासाठी वळसंग येथून महिला मजुरांना ट्रॅक्टरमधून घेऊन शेताकडे निघाले होते. शेतातील बांधावर चढ अत्यंत तीव्र असल्याने ट्रॅक्टर चढवताना अडचण निर्माण झाली. याचवेळी ट्रॅक्टरचा तोल जाऊन तो अचानक उलटला. या दुर्घटनेत चव्हाण यांचा जागीच मृत्यू झाला.
अपघातात अनिता हाक्के आणि छाया काकासाहेब पाटील या गंभीर जखमी झाल्या आहेत. त्यांच्यावर सांगली येथे उपचार सुरू आहेत. तर सरूबाई चेळकर, विमल सूर्यवंशी, राजक्का बंडगर, सुनिता डोंबाळे आणि महादेवी सोलनकर यांच्यावर जत येथील रुग्णालयात उपचार सुरू आहेत.
सुरेश चव्हाण हे सैन्यदलातून निवृत्त झाल्यानंतर शेती व्यवसाय करत होते. त्यांच्या पश्चात आई-वडील, पत्नी, दोन मुले, दोन भाऊ आणि बहिणी असा परिवार आहे. घटनेची जत पोलीस ठाण्यात नोंद झाली असून पोलीस अधिक तपास करत आहेत. या दुर्घटनेमुळे वळसंग परिसरात हळहळ व्यक्त होत आहे.
पडळकरांच्या विजयाचा जत शहरात जल्लोष; डीजेच्या तालावर आमदारांचाही ठेका
जत : जिल्हा मध्यवर्ती सहकारी बँकेच्या निवडणुकीत आमदार गोपीचंद पडळकर यांनी विजय मिळवल्यानंतर जत शहरात समर्थकांनी मोठा जल्लोष केला. मंगळवारी दुपारी आमदार पडळकर शहरात दाखल होताच कार्यकर्त्यांनी गुलालाची उधळण, फटाक्यांची आतषबाजी आणि जोरदार घोषणाबाजी करत त्यांचे स्वागत केले.
शहरात आगमनानंतर आमदार पडळकर यांनी छत्रपती शिवाजी महाराज, डॉ. बाबासाहेब आंबेडकर, महात्मा बसवेश्वर यांच्यासह विविध महापुरुषांच्या पुतळ्यांना पुष्पहार अर्पण करून अभिवादन केले. त्यानंतर विजयी मिरवणुकीला सुरुवात झाली. शहरातील प्रमुख रस्त्यांवर कार्यकर्त्यांची मोठी गर्दी झाली होती. डीजेच्या दणदणाटात कार्यकर्त्यांनी ठेका धरला. विशेष म्हणजे आमदार पडळकर यांनीही कार्यकर्त्यांसोबत डीजेच्या तालावर नृत्य करत जल्लोषात सहभाग घेतला.
या मिरवणुकीत जतच्या नगरपरिषदेचे नगराध्यक्ष डॉ. रवींद्र आरळी, जिल्हा बँकेचे माजी संचालक प्रकाशराव जमदाडे, माजी सभापती सुरेश शिंदे, ज्येष्ठ नेते आकाराम मासाळ, आप्पासाहेब नामाद, जिल्हा परिषद सदस्य सरदार पाटील, रमेश देवर्षी, नाथा पाटील, डॉ. शिवाजी खिलारे, रविकुमार बगली, अण्णा भिसे यांच्यासह नगरसेवक, पदाधिकारी आणि मोठ्या संख्येने कार्यकर्ते सहभागी झाले होते.
डफळापुरात व्यापाऱ्यांसाठी सहकारी पतसंस्था सुरू; छोट्या व्यावसायिकांना मिळणार आर्थिक आधार
डफळापूर : ग्रामीण भागातील छोट्या-मोठ्या व्यापाऱ्यांना आर्थिक पाठबळ मिळावे आणि त्यांच्या व्यवसायाला चालना मिळावी, या उद्देशाने स्थापन करण्यात आलेल्या डफळापूर व्यापारी को-ऑप. क्रेडिट सोसायटीचे उद्घाटन बुधवारी उत्साहात झाले.
प्रगतिशील शेतकरी आप्पासाहेब यमगर (अंकले) यांच्या हस्ते उद्घाटन करण्यात आले. यावेळी नायब तहसीलदार बाळासाहेब सवदे म्हणाले, “अध्यक्ष अशोक सवदे यांनी ही संस्था उभारली आहे. या संस्थेच्या माध्यमातून छोट्या-मोठ्या व्यापाऱ्यांना कर्जपुरवठा होऊन त्यांच्या व्यवसायाला हातभार लागणार आहे.”
ग्रामीण भागात सहकारी पतसंस्थांची निर्मिती करण्यामागे सावकारीला पर्याय उपलब्ध करून देणे, हा मूळ उद्देश होता. पतसंस्थांनी आपली भूमिका योग्य प्रकारे पार पाडल्यास व्यापाऱ्यांना खासगी सावकारांच्या आर्थिक पाशातून मुक्त होण्यास मदत होईल. तसेच या संस्थेच्या माध्यमातून अनेक तरुणांना रोजगाराच्या संधी उपलब्ध होतील, असा विश्वासही यावेळी व्यक्त करण्यात आला.
कार्यक्रमाला जत अर्बन बँकेचे चेअरमन बाळासाहेब हुंछाळकर, सहकार अधिकारी संतोष बोगार, उपकोषागार अधिकारी विठ्ठल पाटील, जत पंचायत समितीचे सदस्य महेश गावडे, दिग्विजय चव्हाण, अभिजीत चव्हाण, सरपंच सुभाष गायकवाड यांच्यासह विविध क्षेत्रांतील मान्यवर उपस्थित होते. संस्थापक अशोक सवदे यांनी आभार मानले.