सारांश: जत येथील श्री यल्लमादेवीची यात्रा भाविकांच्या उत्स्फूर्त सहभागाने उत्साहात पार पडली. देवीची पालखी, नगरप्रदक्षिणा, व किचाच्या विधीने यात्रेची सांगता झाली. यावेळी हजारो भक्तांनी जयघोष करत देवीचे दर्शन घेतले. श्रीमंत डफळे परिवाराने मानकऱ्यांचा सन्मान केला. पोलीस बंदोबस्त असूनही पे पार्किंग आणि अवैध व्यवसायांमुळे भाविकांची लुबाडणूक झाल्याच्या तक्रारी आल्या. पुढील यात्रा 15-19 डिसेंबर 2025 या कालावधीत होणार असून भाविकांनी सुव्यवस्थेची अपेक्षा व्यक्त केली.
जत,(आयर्विन टाइम्स प्रतिनिधी):
जत येथील श्री यल्लमादेवीच्या यात्रेला यंदा भरगच्च गर्दी झाली. लाखो भाविकांच्या उपस्थितीत यात्रेची सांगता देवीच्या पालखी, नगरप्रदक्षिणा, व किचाच्या विधीने झाली. पुढील यात्रा 15 डिसेंबर 2025 ते 19 डिसेंबर 2025 या कालावधीत भरणार असल्याचे श्री. यल्लमादेवी प्रतिष्ठान जतचे अध्यक्ष श्रीमंत शार्दुलराजे डफळे यांनी जाहीर केले.
शनिवारी पहाटे देवीचे पुजारी सुभाष कोळी आणि स्वप्नील कोळी यांनी अभिषेक करून पूजा केली. नंतर देवीची ओटी भरून आरती करण्यात आली. पालखी नगरप्रदक्षिणेसाठी निघाल्यानंतर जत नगरातील विविध ठिकाणी पालखीचे स्वागत करण्यात आले. सुवासिनींनी औक्षण केले आणि घागरीने पाणी ओतून देवीच्या पालखीला शुभेच्छा दिल्या.
प्रदक्षिणा आणि किचाची परंपरा:
राजवाड्यात श्रीमंत डफळे परिवाराने पालखीचे स्वागत केले. यावेळी देवीच्या पुजाऱ्यांसह मानकऱ्यांचा सन्मान करण्यात आला. पालखीचे मानकरी बाळासाहेब कोळी, जगाचे मानकरी काराजनगी येथील ललीता कांबळे आदींचे आहेर माहेर देऊन सन्मान केला. शहरातून प्रदक्षिणा घालून पालखी मंदिर परिसरात पोहोचली आणि मंदिर प्रदक्षिणेसह किचाच्या विधीस प्रारंभ झाला.
पुजारी सुभाष कोळी यांनी अग्नीकुंडाच्या सभोवती प्रदक्षिणा घालत अग्निकुंडात प्रवेश कीरण्याचा विधी पार पाडला. यावेळी उपस्थित भाविकांनी जयघोष केला आणि भक्तीमय वातावरण तयार झाले.
प्रशासनाची भूमिका आणि गैरव्यवहार:
यात्रेत कोणताही अनुचित प्रकार घडू नये म्हणून पोलीस बंदोबस्त ठेवण्यात आला होता. मात्र, पे पार्किंगमधून जबरदस्ती वसूल करण्यात येत असल्याच्या तक्रारी आल्या. तसेच, अवैध व्यवसायांमुळे यात्रेकरूंची लुबाडणूक झाली. प्रशासनाने याकडे लक्ष देण्याची गरज आहे.
पुढील यात्रा आणि घोषवाक्य:
पुढील वर्षीच्या यात्रेचे वेळापत्रक जाहीर झाले असून, यात महत्त्वाच्या दिवसांचा समावेश आहे. मंगळवार दि.१६ डिसेंबर २०२५ रोजी देवीचा गंधोटगीचा दिवस, बुधवार दि.१७ डिसेंबर रोजी देवीचा महानैवैध्य चा दिवस ,गुरूवार दि.१८ डिसेंबर २०२४ रोजी देवीचा किचाचा दिवस व दि.१९ डिसेंबर रोजी अमावास्या आहे. यावेळी भाविकांनी अधिक चांगल्या व्यवस्थेची अपेक्षा व्यक्त केली आहे.
cची यात्रा श्रद्धा, परंपरा, आणि भक्तिभावाने यंदाही गाजली. पुढील वर्षी यात्रेत अधिक सुव्यवस्था आणि पारदर्शकता असावी, अशी भावना उपस्थित भाविकांनी व्यक्त केली.
(शनिवारी जत येथील श्री यल्लमा देवीच्या यात्रेचा कीच पडण्याचा कार्यक्रम पार पडला. यात्रेच्या मुख्य दिवसांची सांगता झाली. यावेळी पालखी प्रदक्षिणा सोहळा पार पडला. भाविकांनी मोठ्या भक्तिभावाने पालख्यांवर खारीक, खोबरे, भंडारा उधळला. छायाचित्र: ए.एम. ऐनापुरे,जत) jat yallama yatra news