ईश्वरपूरच्या कामेरी नाका परिसरात सुरज कांबळे खून प्रकरणी साहिल कांबळे आणि अंकित कांबळे यांना २४ तासांत अटक. स्थानिक गुन्हे अन्वेषण शाखा व ईश्वरपूर पोलिसांची संयुक्त कारवाई.
ईश्वरपूर : कामेरी नाका परिसरात सुरज महादेव कांबळे (वय ३१, रा. आंबेडकरनगर, ईश्वरपूर) या युवकाचा धारदार शस्त्रांनी वार करून खून केल्याप्रकरणी दोघा संशयितांना पोलिसांनी अवघ्या २४ तासांत अटक केली. साहिल अनिल कांबळे (वय २७) आणि अंकित मुकुंद कांबळे (वय ३०, दोघेही रा. आंबेडकरनगर, ईश्वरपूर) अशी अटक केलेल्यांची नावे आहेत. कासेगाव ते कराड महामार्गालगत असलेल्या हॉटेल सोळा कुळीसमोरील रस्त्यावरून त्यांना ताब्यात घेण्यात आले. स्थानिक गुन्हे अन्वेषण शाखा आणि ईश्वरपूर पोलिसांनी संयुक्तपणे ही कारवाई केली.
पोलिसांनी दिलेल्या माहितीनुसार, रविवार, १ नोव्हेंबर रोजी रात्री कामेरी नाका परिसरात सुरज कांबळे याच्यावर कोयता आणि चाकूसारख्या धारदार शस्त्रांनी हल्ला करण्यात आला होता. डोके, कपाळ, चेहरा, पोट आणि पाठीवर वार झाल्याने तो गंभीर जखमी झाला. त्याला उपचारासाठी खासगी रुग्णालयात दाखल करण्यात आले; मात्र उपचारांपूर्वीच त्याचा मृत्यू झाला. याप्रकरणी त्याचा चुलतभाऊ आत्माराम विश्वनाथ कांबळे यांनी ईश्वरपूर पोलिसांत फिर्याद दिली होती.
या हत्येमागे पूर्वी मोडलेल्या प्रेमविवाहाचा वाद आणि घटनेच्या दिवशी कपड्याच्या दुकानात झालेल्या भांडणाची पार्श्वभूमी असल्याचे प्राथमिक तपासात समोर आले आहे. सुरज आणि अंकित यांच्यात प्रेमविवाह मोडल्यापासून वाद होता. घटनेच्या दिवशीही कपड्याच्या दुकानात सुरज आणि साहिल यांच्यात वाद होऊन मारहाण झाली होती. त्यानंतर हा वाद मिटवण्याच्या बहाण्याने सुरजला कामेरी नाका येथे बोलावण्यात आल्याची माहिती यापूर्वीच्या वृत्तातून समोर आली होती.
गुन्ह्याचे गांभीर्य लक्षात घेऊन पोलीस अधीक्षक तुषार दोशी आणि अपर पोलीस अधीक्षक कल्पना बारवकर यांनी आरोपींचा तातडीने शोध घेण्याचे आदेश दिले होते. त्यानुसार स्थानिक गुन्हे अन्वेषण शाखेचे पोलीस निरीक्षक संजीव इधाडे यांनी सहायक पोलीस निरीक्षक राजेंद्र यादव यांच्या नेतृत्वाखाली पथक तयार केले. ईश्वर-पूर पोलीस ठाण्याचे पोलीस निरीक्षक संदीप पाटील यांच्या पथकानेही तपासात सहभाग घेतला.
दोन्ही पथके संशयितांचा शोध घेत असताना कासेगाव शहर परिसरात महामार्गालगत आरोपी असल्याची गोपनीय माहिती मिळाली. त्यानुसार पोलिसांनी हॉटेल सोळा कुळीसमोरील रस्त्यावर सापळा रचून साहिल आणि अंकित या दोघांना ताब्यात घेतले. चौकशीत त्यांनी सुरजसोबत झालेल्या भांडणाचा आणि पूर्वी मोडलेल्या लग्नाचा राग मनात धरून कोयता व चाकूने हल्ला केल्याची कबुली दिल्याचे पोलिसांनी सांगितले.
दोन्ही आरोपींना अटक करण्यात आली असून, पुढील तपासासाठी गुन्हा ईश्वर-पूर पोलीस ठाण्याकडे वर्ग करण्यात आला आहे. ही कारवाई स्थानिक गुन्हे अन्वेषण शाखा, ईश्वरपूर पोलीस ठाणे आणि सायबर पोलीस ठाण्यातील अधिकारी व कर्मचाऱ्यांच्या सहभागातून करण्यात आली.