जत नगरपरिषद निवडणुकीच्या पार्श्वभूमीवर काँग्रेसला मोठा धक्का बसला आहे. ज्येष्ठ नेते अशोक व शुभांगी बन्नेनवर यांनी आमदार गोपीचंद पडळकर यांच्या उपस्थितीत भाजपमध्ये प्रवेश केला.
जत, (आयर्विन टाइम्स प्रतिनिधी) :
जत नगरपरिषद निवडणुकीच्या पार्श्वभूमीवर काँग्रेसला मोठा धक्का बसला आहे. काँग्रेसचे ज्येष्ठ नेते अशोक बन्नेनवर तसेच माजी नगराध्यक्षा शुभांगी बन्नेनवर यांनी आपल्या कार्यकर्त्यांसह भाजपमध्ये प्रवेश केला आहे. शनिवारी आमदार गोपीचंद पडळकर यांच्या उपस्थितीत झालेल्या या पक्षप्रवेशामुळे जतच्या राजकारणात मोठी खळबळ उडाली आहे.
नगराध्यक्ष पद हे खुले झाल्याने अशोक बन्नेनवर यांनी पुन्हा निवडणुकीसाठी तयारी दर्शवली होती. त्यांनी काँग्रेसकडून उमेदवारीची इच्छा व्यक्त केली होती, मात्र पक्षात कोणताही निर्णय न झाल्याने त्यांनी पत्नीसमवेत भाजपचा झेंडा हातात घेतला. या वेळी आमदार गोपीचंद पडळकर यांनी त्यांचा सत्कार केला.
अशोक बन्नेनवर म्हणाले,
“गेल्या पंचवार्षिक काळात जत शहराच्या विकासासाठी आम्ही शक्य ते सर्व प्रयत्न केले. काँग्रेसकडे सत्ता असताना अनेक विकासकामे केली, मात्र सत्तेच्या अभावामुळे ती थांबली. त्यामुळे ‘सत्तेशिवाय विकास शक्य नाही’ हे लक्षात घेऊनच आम्ही भाजपमध्ये प्रवेश करण्याचा निर्णय घेतला.”
दरम्यान, आमदार गोपीचंद पडळकर म्हणाले,
“आम्हाला विरोधासाठी विरोध करायचा नाही. जत शहराच्या सर्वांगीण विकासाचे ध्येय आम्ही ठेवले आहे. नव्या पाणीपुरवठा योजनेचे काम प्रगतिपथावर असून, भाजप सरकार जनतेच्या हितासाठी ठामपणे काम करत आहे. नागरिकांनी भाजपच्या पाठीशी राहावे.”
या पक्षप्रवेश सोहळ्याला भाजपचे जिल्हा उपाध्यक्ष शिवाजी डोंगरे, ज्येष्ठ नेते डॉ. रवींद्र आरळी, अण्णा भिसे, चंद्रशेखर गोब्बी, सरदार पाटील, सुभाष गोब्बी, परशुराम मोरे, विक्रम ताड, संतोष मोटे, रवी मानवर, बंटी नदाफ, सुभाष कांबळे, किरण शिंदे, अनिल पाटील, अरुण साळे, प्रकाश मोटे आदी कार्यकर्ते उपस्थित होते.
नगरपरिषद निवडणुकीच्या तोंडावर झालेल्या या प्रवेशामुळे ज-तमधील राजकीय समीकरणे बदलण्याची शक्यता व्यक्त होत आहे. काँग्रेसच्या गोटात नाराजी निर्माण झाली असून भाजपसाठी ही मोठी ताकद वाढ असल्याचे मानले जाते.