घटना सांगलीतील ८० फुटी रोड, नागराज कॉलनीमध्ये घडली
आयर्विन टाइम्स/ सांगली
सांगलीच्या विश्रामबाग पोलीस ठाण्याच्या हद्दीत घडलेल्या खुनाचा प्रयत्न आणि गंभीर दुखापत प्रकरणात पोलिसांनी तात्काळ कारवाई करत दोन आरोपींना अटक केली आहे. गुन्हा रजिस्टर क्रमांक ३७०/२०२४ अंतर्गत आरोपींनी पोटात वार करून यश ऊर्फ अक्षय परशुराम पाटील (वय २४ वर्षे रा. अंबाजी माळी झोपडपट्टी चांदणी चौक बिलाल मस्जिद शेजारी सांगली) या व्यक्तीला ठार मारण्याचा प्रयत्न केला होता. हा हल्ला सांगलीतील ८० फुटी रोड, नागराज कॉलनी येथे झाला.
घटनास्थळी वरिष्ठ अधिकाऱ्यांची भेट
गंभीर गुन्ह्याची माहिती मिळताच अपर पोलीस अधीक्षक रितु खोखर आणि उपविभागीय पोलीस अधिकारी विमला एम यांनी घटनास्थळी भेट देऊन गुन्ह्याचा तपास तातडीने करण्याचे निर्देश दिले. त्यानुसार, विश्रामबाग पोलीस ठाण्याचे निरीक्षक प्रविणकुमार कांबळे यांनी गुन्हे प्रकटीकरण शाखेचे अधिकारी आणि अंमलदार यांच्या दोन पथकांना आरोपींचा शोध घेण्याचे आदेश दिले.
आरोपींची अटक
खास बातमीदारांच्या माहितीनुसार, आरोपी सांगलीतील उषःकाल हॉस्पिटलच्या मागे लपले असल्याचे समजले. पोलीस पथकाने तात्काळ तेथे सापळा रचून आरोपी धनराज गजानन राऊत (वय २९ रा. श्रीराम निवास मार्ग क्रमांक २ दत्तनगर विश्रामबाग सांगली), सुरज शरद तांदळे (वय २९ रा. मार्ग क्रमांक ३ दत्तनगर विश्रामबाग sangli) यांना ताब्यात घेतले. चौकशी दरम्यान, आरोपींनी गुन्ह्याची कबुली दिली.
अदालत कारवाई
अटक केलेल्या आरोपींना न्यायालयात हजर केले असता, न्यायालयाने त्यांना चार दिवसांची पोलीस कोठडी मंजूर केली आहे.
विशेष पोलिसांचे योगदान
सदर प्रकरणातील कारवाईमध्ये पोलीस निरीक्षक प्रविणकुमार कांबळे, सहायक पोलीस निरीक्षक चेतन माने, पोहेकॉ बिरोबा नरळे, संदीप साळुंखे,अमर मोहिते, संदीप माने, पोकॉ प्रशांत माळी, महमद मुलाणी, आर्यन देशिंगकर, योगेश पाटील, शक्ती गायकवाड आणि गणेश बामणे यांनी महत्त्वाची भूमिका बजावली. गुन्ह्याचा पुढील तपास सहाय्यक पोलीस निरीक्षक कविता नाईक करत आहेत.