सारांश: जत पोलिसांनी बिळूर येथे श्री काळभैरवनाथ यात्रेच्या पार्श्वभूमीवर बेकायदेशीर दारू वाहतूक करणाऱ्या वाहनावर कारवाई केली. या कारवाईत १ लाख ३८ हजार किमतीची दारू आणि ५ लाख रुपये किमतीचे वाहन असा एकूण ६.३८ लाखांचा मुद्देमाल जप्त करण्यात आला. हुच्चेश्वर बिराजदार आणि गुरुबसू हुन्नूर यांच्यावर महाराष्ट्र दारूबंदी अधिनियमांतर्गत गुन्हा दाखल करण्यात आला आहे. पोलिस उपाधीक्षक सुनील साळुंखे यांनी बेकायदेशीर दारू विक्रीविरोधात कठोर कारवाई करण्याचा इशारा दिला आहे.
जत, (आयर्विन टाइम्स प्रतिनिधी):
बिळूर (ता. जत) येथील श्री काळभैरवनाथ यात्रेच्या पार्श्वभूमीवर जत पोलिसांनी मोठी कारवाई करत बेकायदेशीर दारूसाठा जप्त केला. जतहून चारचाकी वाहनातून दारू विक्रीसाठी बिळूर येथे नेत असताना पोलिसांनी कारवाई करून १ लाख ३८ हजार रुपये किमतीची विदेशी दारू आणि ५ लाख रुपये किमतीचे वाहन असा एकूण ६ लाख ३८ हजार रुपयांचा मुद्देमाल जप्त केला.
ही कारवाई पोलिस उपाधीक्षक कार्यालयाने केली असून याप्रकरणी परमेश्वर नाना ऐवळे यांनी फिर्याद दिली आहे. पोलिसांनी महाराष्ट्र दारूबंदी अधिनियम कलम ६५ नुसार हुच्चेश्वर रमेश बिराजदार (वय २४, रा. बसरगी), गुरुबसू प्रकाश हुन्नूर (वय २४, रा. बिळूर) आणि अन्य एकावर गुन्हा दाखल केला आहे.
कसे करण्यात आले ऑपरेशन?
जत तालुक्यातील बिळूर येथील काळभैरवनाथ यात्रा सुरू असल्याने येथे मोठ्या प्रमाणात गर्दी असते. या गर्दीचा गैरफायदा घेत बिगरपरवाना दारू विक्रीसाठी नेत असल्याची माहिती पोलिस उपाधीक्षक कार्यालयास मिळाली. त्यानुसार पोलिसांनी सापळा रचून (केए ३७, एन १४६५) या चारचाकी वाहनाची तपासणी केली असता त्यामध्ये मोठ्या प्रमाणात विदेशी दारू आढळून आली.
पोलिसांचा इशारा
या कारवाईबाबत पोलिस उपाधीक्षक सुनील साळुंखे म्हणाले, “बेकायदेशीर दारू वाहतूक व विक्री करणाऱ्यांविरोधात कठोर कारवाई करण्यात येईल. नागरिकांनी अशा अवैध व्यवसायाची माहिती पोलिसांना द्यावी. आम्ही संबंधितांची नावे गोपनीय ठेवू.”
याप्रकरणी पुढील तपास पोलिसांकडून सुरू आहे. jat crime news