बेळगाव-कोल्हापूर महामार्गावर निपाणीजवळील तवंदी घाटात एक भीषण अपघात
आयर्विन टाइम्स / निपाणी
रविवारी संध्याकाळी सहा वाजता बेळगाव-कोल्हापूर महामार्गावर निपाणीजवळील तवंदी घाटात एक भीषण अपघात (accident) घडला. एक अवजड ट्रक चालकाचे नियंत्रण सुटल्यामुळे, समोरील आठ ते दहा वाहनांना धडक दिली. या अपघातात तिघांचा जागीच मृत्यू झाला आणि दहा पेक्षा जास्त लोक जखमी झाले. घटनेची भीषणता पाहता मृत आणि जखमींचा आकडा आणखी वाढण्याची भीती व्यक्त केली जात आहे.
ठार झालेल्यांची ओळख
– संतोष गणपती माने (४५, भोज, ता. निपाणी) – मराठी शिक्षक
– मैजबीन महमदहुसेन मकानदार (५८, दर्गाह गल्ली, निपाणी)
– दिलदार ताजुद्दीन मुल्ला (६७, पट्टणकोडोली, कोल्हापूर)
संतोष माने आणि मैजबीन मकानदार यांचा जागीच मृत्यू झाला, तर दिलदार मुल्ला यांचा कोल्हापूरच्या खासगी रुग्णालयात मृत्यू झाला.
जखमींची नावे:
रेखा गाडीवडर (३५, खडकलाट), सानिया मुल्ला (२४, कोल्हापूर), परवीन मुल्ला (५६, कोल्हापूर), श्रेया नेगलुरे (२४, हुबळी), मंजुनाथ तेंडुलकर (५२, हाबेरी), सुपर्णा नेगलुरे (५८, हुबळी), नफुरा शेख (८, कोल्हापूर) हे जखमींमध्ये आहेत. त्यांच्यावर निपाणी आणि कोल्हापूरच्या रुग्णालयांत उपचार सुरू आहेत.
घटनेचा तपशील
अपघाताला कारणीभूत ठरलेला ट्रक बेळगावहून निपाणीकडे जात होता. तवंदी घाटात ट्रकचा ब्रेक फेल झाल्याने चालकाचे नियंत्रण सुटले. त्याने समोरील वाहनांवर धडक देण्यास सुरुवात केली. या भीषण धडकेत संतोष माने हे दुचाकीवरून जात असताना ट्रकने त्यांना उडवले आणि त्यांचा जागीच मृत्यू झाला. पुढील प्रवासात ट्रकने तीन कार, चार ट्रक, आणि अन्य वाहने जोरात धडकावली.
अपघातानंतर स्थानिक लोकांनी घटनास्थळी धाव घेतली आणि मदतकार्य सुरू केले. काहीजण मोटारीत अडकले होते, ज्यांना लोकांनी बाहेर काढून जवळच्या रुग्णालयात हलवले. एक कुटुंब संकेश्वरहून निपाणीकडे येत असताना त्यांच्या गाडीला ट्रकची धडक बसल्याने मैजबीन मकानदार यांचा जागीच मृत्यू झाला, तर अन्य सदस्य गंभीर जखमी झाले.
वाहतूक कोंडी आणि बचाव कार्य
घटनास्थळी मोठ्या प्रमाणावर वाहतूक कोंडी झाली होती. अपघातग्रस्त ट्रक आणि इतर वाहनांच्या तुकड्यांमुळे रस्त्यावर चक्काचूर झालेली स्थिती होती. दोन ट्रक चक्काचूर होऊन रस्त्यामध्ये अडले होते. मोटारसायकल सुमारे दोनशे फूट फरफटत गेली होती. कंटेनरची उचलणी करण्याचे काम रात्री उशिरापर्यंत सुरू होते.
अपघाताची भीषणता पाहता परिसरातील नागरिकांनी आणि पोलीस प्रशासनाने मदतीसाठी पुढाकार घेतला. ट्रक चालकाला कोणतीही मोठी दुखापत झाली नाही, पण घटनास्थळावरील दृश्य मन हेलावून टाकणारे होते.