२०२५ वर्षाने बॉलिवूड आणि ओटीटी दोन्ही माध्यमांवर अॅक्शन, थरार, प्रेम आणि भावनिक कथांचा नवा अध्याय उघडला आहे. ‘कांतारा – चैप्टर 1’, ‘वार 2’, ‘संतोष’, ‘लोका’सह अनेक चित्रपटांनी प्रेक्षकांची मने जिंकली.
२०२५ हे वर्ष भारतीय चित्रपटसृष्टीसाठी विशेष ठरत आहे. वर्षाच्या शेवटच्या दोन महिन्यांकडे वाटचाल सुरू असताना, बॉलिवूडसह इतर प्रादेशिक चित्रपटसृष्टीत विविध प्रकारच्या सिनेमांची मेजवानी सुरू आहे. या वर्षात प्रदर्शित झालेल्या चित्रपटांनी प्रेक्षकांना मनोरंजन, भावना आणि थराराचा परिपूर्ण संगम दिला आहे.
पौराणिक कथानक असलेला ‘कांतारा – चैप्टर 1’, भयपट आणि विनोदीतेचा मिश्रण असलेला ‘थामां’, नवोदित कलाकारांची प्रेमकहाणी सांगणारा ‘सैयारा’, आणि भावनिक तसेच शिक्षणात्मक असा आमिर खानचा ‘सितारे जमीन पर’— या सर्व चित्रपटांनी २०२५ मधील सिनेविविधतेला नवी झळाळी दिली आहे.
या वर्षी अनेक चित्रपटांनी बॉक्स ऑफिसवर उल्लेखनीय यश मिळवले आहे. ऐतिहासिक गाथा मांडणारा ‘छावा’, अॅक्शन थ्रिलर ‘वार 2’, तसेच प्रेक्षकांच्या मनावर अधिराज्य गाजवणारे ‘कांतारा – चैप्टर 1’ आणि ‘सितारे जमीन पर’ हे चित्रपट यशस्वी ठरले आहेत.
ओटीटीवरील थरारक चित्रपटांची भरभराट
२०२५ हे वर्ष फक्त चित्रपटगृहापुरते मर्यादित न राहता ‘ओटीटी’ प्लॅटफॉर्मसाठीदेखील सुवर्णयुग ठरले आहे. अनेक रहस्य, अॅक्शन आणि गुन्हेगारी विषयांवरील चित्रपट प्रेक्षकांना भारावून टाकत आहेत.
त्यापैकीच एक उल्लेखनीय चित्रपट म्हणजे ‘आयडेंटिटी’— मल्याळम, तमिळ, तेलुगू आणि हिंदी अशा चार भाषांमध्ये तयार झालेला हा चित्रपट एका पोलिस अधिकाऱ्याची आणि स्केच कलाकाराची कथा सांगतो, जे एका रहस्यमय खुनाच्या मागचा सत्य शोधतात. या चित्रपटाने उत्कृष्ट कमाई करत समीक्षकांकडूनही प्रशंसा मिळवली आहे.
तसेच, ‘ऑफिसर ऑन ड्युटी’ या चित्रपटात एका प्रामाणिक पोलिस निरीक्षकाचे द्वंद्व दाखवले आहे— जो कर्तव्य आणि कुटुंब या दोन्ही जबाबदाऱ्यांमध्ये समतोल साधण्याचा प्रयत्न करतो.
महिला केंद्रित आणि आंतरराष्ट्रीय चित्रपटांचे यश
यूकेकडून ऑस्करसाठी ‘बेस्ट इंटरनॅशनल फीचर फिल्म’ या श्रेणीत निवडलेला चित्रपट ‘संतोष’ आता ओटीटीवर प्रदर्शित झाला आहे. एका दलित किशोरीच्या बलात्कार आणि हत्येच्या प्रकरणात न्याय मिळवण्यासाठी झगडणाऱ्या विधवा महिला पोलिस निरीक्षिकेची ही प्रभावी कथा समाजमनाला भिडणारी ठरते.
हेदेखील वाचा: दिवाळी आणि चित्रपटसृष्टी : रुपेरी पडद्यावर उजळलेले दीपोत्सवाचे सोनेरी क्षण
दक्षिणेचे आणि रहस्यप्रधान चित्रपट
तेलुगू सुपरस्टार पवन कल्याण सिंहचा ‘दे कॉल हिम ओजी’ हा लोकप्रिय अॅक्शनपट हिंदी प्रेक्षकांसाठीही उपलब्ध झाला आहे. तसेच, दिग्दर्शक प्रियदर्शन यांच्या कन्या कल्याणी प्रियदर्शन हिचा मुख्य भूमिकेत असलेला ‘लोका: चैप्टर 1’ हा चित्रपट अंधाऱ्या शक्तींच्या आणि गूढ कटकारस्थानांच्या जगात घडणाऱ्या थरारक घटनांवर आधारित असून सध्या ओटीटीवर धुमाकूळ घालत आहे.
प्रसिद्ध मानसशास्त्रीय थरारपट ‘असुर’नंतर अभिनेता अरशद वारसी पुन्हा एकदा ‘भागवत: चैप्टर वन – राक्षस’ या रहस्यप्रधान कथेत झळकणार आहे.
प्रेम, अॅक्शन आणि वास्तवावर आधारित कथा
किरण अब्बास आणि युक्ती थरेजा अभिनीत ‘के रॅम्प’ ही एक रोमँटिक रहस्यकथा प्रेक्षकांचे लक्ष वेधून घेत आहे.
खऱ्या घटनेवर आधारित ‘गुड न्यूज’ (प्लेन हायजॅक) या चित्रपटात सरकारी अधिकाऱ्यांच्या कार्यपद्धतीभोवती फिरणारी थरारक कथा दाखवली आहे. हा चित्रपट ऑक्टोबर महिन्यात ओटीटीवर प्रदर्शित झाला असून त्याला चांगला प्रतिसाद मिळत आहे.
आगामी चित्रपटांची उत्सुकता
या वर्षीच नव्हे तर पुढील काही महिन्यांतदेखील अॅक्शन आणि थरारपटांची मालिका सुरूच राहणार आहे. त्यामध्ये रणवीर सिंह अभिनीत ‘धुरंधर’ आणि राणी मुखर्जी हिचा अॅक्शनप्रधान ‘मरदानी 3’ हे चित्रपट विशेष आकर्षण ठरत आहेत.
२०२५ हे वर्ष केवळ मनोरंजनापुरते मर्यादित न राहता, विविध सामाजिक, भावनिक आणि तांत्रिक अंगांनी परिपूर्ण सिनेवर्ष ठरत आहे. मोठ्या पडद्यापासून ओटीटीपर्यंत प्रेक्षकांना थरार, प्रेम, र-हस्य आणि प्रेरणेचे सर्व रंग अनुभवायला मिळत आहेत, हेच या वर्षाचे खरे वैशिष्ट्य आहे.