जत तालुक्यातील संख येथील श्रेया हिप्परगी हिने राज्य निवड स्पर्धेत चमकदार कामगिरी करीत राष्ट्रीय शालेय बुद्धिबळ स्पर्धेसाठी महाराष्ट्र संघात स्थान मिळवले. २७ ते ३० नोव्हेंबरदरम्यान त्रिपुरा येथे होणाऱ्या स्पर्धेत ती महाराष्ट्राचे प्रतिनिधित्व करणार आहे.
जत (आयर्विन टाइम्स प्रतिनिधी):
जत तालुक्यातील संख येथील राजारामबापू पाटील माध्यमिक प्रशाला आणि ज्युनिअर कॉलेजची विद्यार्थीनी श्रेया हिप्परगी हिने उत्कृष्ट कामगिरीची परंपरा कायम राखत राष्ट्रीय शालेय बुद्धिबळ स्पर्धेसाठी महाराष्ट्र संघात स्थान मिळवले आहे. तिच्या या यशामुळे शाळा, तालुका आणि संपूर्ण सांगली जिल्ह्याचा मोठा सन्मान झाला आहे.
सातारा येथील कला व वाणिज्य महाविद्यालयात नुकत्याच क्रीडा व युवक सेवा संचालनालय (पुणे) आणि जिल्हा क्रीडा परिषदेच्या वतीने आयोजित महाराष्ट्र राज्य निवड बुद्धिबळ स्पर्धेत १७ वर्षांखालील वयोगटात राज्यातील आठ क्रीडा विभागांमधून निवड झालेल्या ४० स्पर्धकांनी सहभाग घेतला.
या कडव्या स्पर्धेत श्रेया हिप्परगीने सहापैकी साडेचार गुणांची कमाई करून महाराष्ट्राच्या राष्ट्रीय संघात आपले स्थान पक्के केले. तिची निवड २७ ते ३० नोव्हेंबरदरम्यान त्रिपुरा येथे होणाऱ्या ‘एसजीएफआय’ राष्ट्रीय शालेय बुद्धिबळ स्पर्धेसाठी झाली आहे.
महाराष्ट्राचा १७ वर्षांखालील मुलींचा राष्ट्रीय बुद्धिबळ संघ (२०२५):
- सानी देशपांडे (छत्रपती संभाजीनगर)
- सई पाटील (पुणे)
- श्रद्धा बजाज (नागपूर)
- वैष्णवी मानकर (नाशिक)
- श्रेया हिप्परगी (सांगली)
श्रेया सध्या दहावीमध्ये शिक्षण घेत असून तिला बुद्धिबळ क्षेत्रात घडविण्यासाठी प्रशिक्षक समुख गायकवाड यांनी विशेष मार्गदर्शन केले. तसेच संस्था सचिव सुभाष पाटील, मुख्याध्यापक आय. बी. कन्नुरे, सुपरवायझर पी. एच. बिरादार, क्रीडाशिक्षक ए. एस. बिराजदार, सर्व शिक्षक व कर्मचारी यांचे पाठबळ मिळाले.
नूतन बुद्धिबळ मंडळ आणि सांगली जिल्हा बुद्धिबळ संघटनेच्या पदाधिकाऱ्यांनी तसेच फिडे पंच, प्रशिक्षक आणि विविध बुद्धिबळ संशोधकांनी श्रेयाचे मनःपूर्वक अभिनंदन केले आहे. तिच्या सातत्यपूर्ण मेहनतीचे हे फलित असल्याचे सर्वांनी कौतुकपूर्वक सांगितले.
या यशामुळे तालुक्यात आनंदाचे वातावरण
श्रेया हिप्परगीच्या यशामुळे संख गावासह संपूर्ण जत तालुक्यात उत्साहाचे वातावरण आहे. ग्रामीण भागातील विद्यार्थीदेखील योग्य मार्गदर्शन मिळाल्यास राष्ट्रीय खेळपट्टीवर चमकू शकतात, याचा सुंदर आदर्श श्रेयाने घालून दिला आहे.
श्रेया आणि तिच्या प्रशिक्षकांचे मनःपूर्वक अभिनंदन!
आगामी राष्ट्रीय स्पर्धेसाठी हार्दिक शुभेच्छा!