जत येथील श्री रामराव विद्यामंदिर हायस्कूलकडून १५ ते १७ नोव्हेंबर दरम्यान श्री ज्ञानेश्वर स्मृती व्याख्यानमालेचे आयोजन. प्रख्यात वक्त्यांची प्रेरणादायी व्याख्याने, जनमेजयराजे भोसले यांची प्रमुख उपस्थिती.
(आयर्विन टाइम्स प्रतिनिधी, जत)
जत येथील श्री रामराव विद्यामंदिर हायस्कूल या प्रतिष्ठित शिक्षणसंस्थेत दरवर्षीप्रमाणे यंदाही ‘श्री ज्ञानेश्वर स्मृती व्याख्यानमाला’ आयोजित करण्यात आली आहे. १५ ते १७ नोव्हेंबर या कालावधीत विद्यालयाच्या प्रशस्त क्रीडांगणावर सायंकाळी सहा ते साडेसात या वेळेत ही व्याख्यानमाला पार पडणार आहे.
या तीन दिवसांच्या कार्यक्रमात ज्ञान, संस्कार आणि अध्यात्म यांचा संगम अनुभवायला मिळणार आहे. प्रत्येक दिवशी प्रसिद्ध व विचारवंत व्यक्तिमत्वांची उपस्थिती या व्याख्यानमालेत रंगत आणणार आहे —
- शनिवार, १५ नोव्हेंबर
वक्ते: श्री. गणेश शिंदे (आहिल्यानगर)
विषय: “विद्यार्थ्यांच्या जडणघडणीत पालकांची भूमिका”
— सध्याच्या सामाजिक आणि कौटुंबिक परिस्थितीत पालकांचा सहभाग विद्यार्थ्यांच्या व्यक्तिमत्व विकासात किती महत्त्वाचा आहे, यावर श्री. शिंदे मार्गदर्शन करतील. - रविवार, १६ नोव्हेंबर
वक्ते: श्री. सचिन परब (मुंबई)
विषय: “महात्मा बसवेश्वर ते संत ज्ञानेश्वर — जीवनपट”
— संत परंपरेचा ऐतिहासिक प्रवास आणि त्यातील सामाजिक परिवर्तनाची गाथा यावर परब यांचे प्रेरणादायी विवेचन होईल. - सोमवार, १७ नोव्हेंबर
वक्ते: ह.भ.प. श्री वासुदेव जोशी (औदुंबर)
विषय: “ज्ञानेश्वर माऊली संजीवन समाधी सोहळा”
— संत ज्ञानेश्वरांच्या समाधीचा आध्यात्मिक अर्थ आणि त्यांच्या कार्याचा व्यापक प्रभाव याविषयी रसाळ व भक्तिभावपूर्ण विवेचन होईल.
या कार्यक्रमाला श्री स्वामी समर्थ अन्नछत्र मंडळ अक्कलकोटचे संस्थापक अध्यक्ष जनमेजयराजे विजयसिंहराजे भोसले प्रमुख अतिथी म्हणून उपस्थित राहणार आहेत.
शंभर पंचवीस वर्षांहून अधिक इतिहास असलेल्या या विद्यालयात ३१ वर्षांपासून सुरू असलेली ही व्याख्यानमाला जतच्या सांस्कृतिक जीवनातील एक मानबिंदू बनली आहे. ज्ञानेश्वर माऊलींच्या कार्यातून प्रेरणा घेत या व्याख्यानमालेने अनेकांना विचारप्रबोधनाचा व आत्मबोधाचा मार्ग दाखवला आहे.
गेल्या तीन दशकांत या व्याख्यानमालेत प्राचार्य शिवाजीराव भोसले, बाबामहाराज सातारकर, विश्वेष बोडस, प्रा. सु. ग. शेवडे, अनंत दीक्षित, डॉ. यु. म. पठाण, प्रा. इंद्रजित देशमुख, ह.भ.प. दादामहाराज मनमाडकर, निर्मलकुमार फडकुले, प्रा. आप्पासाहेब खोत यांसारख्या नामवंत व्यक्तिमत्वांच्या उपस्थितीने व्याख्यानमाला अधिक प्रभावी बनली आहे.
या वर्षीही व्याख्यानमालेचा अध्यात्मिक व वैचारिक लाभ घेण्यासाठी जतवासीयांना प्राचार्य शिवाजी शिंदे यांनी आवाहन केले आहे.
🪔 विशेष आकर्षण:
ज्ञानेश्वरी परंपरेच्या स्मृतींना उजाळा देणारे हे व्याख्यान पर्व — संतवाङ्मय, संस्कार आणि विचारांचा उत्सव!