जत पोलिसांनी मोठी कारवाई करत शहरात बेकायदेशीर विक्रीसाठी आणलेल्या सहा देशी पिस्तूल, काडतूस आणि दुचाकीसह दोघांना अटक केली. 3.46 लाखांचा मुद्देमाल जप्त. मध्य प्रदेशातील अवैध पिस्तूल रॅकेटचा धागा पोलिसांच्या तपासात समोर. संपूर्ण प्रकरणाची सविस्तर माहिती वाचा.
जत, (आयर्विन टाइम्स प्रतिनिधी) :
जत शहरात बेकायदेशीरपणे विक्रीसाठी आणलेल्या सहा देशी बनावटीच्या पिस्तूलांसह जिवंत काडतूस आणि गुन्ह्यात वापरलेली दुचाकी जत पोलिसांनी थरारक सापळा रचून जप्त केली. जप्त मुद्देमालाची एकूण किंमत तब्बल तीन लाख ४६ हजार रुपये इतकी आहे. ८ नोव्हेंबर रोजी दुपारी १.४५ वाजता ही कारवाई करण्यात आली. याबाबत कॉन्स्टेबल सुभाष काळेल यांनी जत पोलिस ठाण्यात फिर्याद दिली असून मारुती ऊर्फ बबलू श्रीमंत गलांडे (वय ३०, रा. विठ्ठलनगर, ज-त) आणि आकाश सुरेश हजारे (वय २७, रा. घुट्टेवाडी, बारामती, पुणे) यांच्यावर गुन्हा दाखल करण्यात आला आहे.
गोपनीय माहितीच्या आधारे रचला सापळा
जत पोलिसांना गोपनीय बातमीदारामार्फत माहिती मिळाली होती की विजयपूर रस्त्यावरील एचपी पेट्रोलपंपावर देशी पिस्तूलांची बेकायदेशीर विक्री होणार आहे. मिळालेल्या सूचनेनंतर पोलिस अधीक्षक संदीप घुगे, अप्पर पोलिस अधीक्षक कल्पना बारवकर आणि उपविभागीय पोलिस अधिकारी सचिन थोरबोले यांच्या मार्गदर्शनाखाली विशेष मोहीम आखण्यात आली.
पोलिस निरीक्षक संदीप कोळेकर यांच्या नेतृत्वाखाली उपनिरीक्षक व्ही. व्ही. पोटे, उपनिरीक्षक प्रशांत चव्हाण यांच्यासह पोलिस कर्मचारी अच्युतराव माने, सचिन शिंदे, विक्रम घोदे, नाथा खोत, सागर करांडे, सुभाष काळेल तसेच सायबर शाखेतील अजय पाटील आणि अभिजित पाटील यांनी पेट्रोलपंपासमोर अचूक बेत आखून सापळा रचला.
सहा पिस्तूल आणि काडतूसांसह दोघांना ताब्यात
कारवाईदरम्यान बबलू गलांडे याला पकडण्यात आले आणि त्याच्या शरीरझडतीतून तीन पिस्तूल आणि जिवंत काडतूस जप्त करण्यात आले. पुढील चौकशीत त्याने आपल्या साथीदाराचे नाव आकाश हजारे उघड केले. हजारेकडूनही तीन पिस्तूल आणि काडतूस हस्तगत करण्यात आले. दोघांकडून मिळालेला एकूण मुद्देमाल ३,४६,००० रुपये इतका आहे.
तपासात हे दोघे पिस्तूलांची अवैध विक्री करण्यासाठी शहरात आले असल्याचे स्पष्ट झाले.
हेदेखील वाचा: अल्पवयीन विद्यार्थिनीवर अत्याचाराचा प्रयत्न करणाऱ्या युवकाला 10 वर्षे सक्तमजुरी
मध्य प्रदेशातील अवैध कारखान्याशी संबंध उघड
या चौकशीत मोठा खुलासा झाला — जप्त पिस्तूलांची खरेदी मध्य प्रदेशातील अवैध कारखान्यातून करण्यात आली होती. जत पोलिसांनी ही माहिती गुप्त ठेवत मध्य प्रदेशात धाड टाकली, मात्र मुख्य संशयित पोलिसांपूर्वीच पसार झाला. त्यामुळे हे संपूर्ण रॅकेट उघडे पडणे थोडक्यात राहिले.
तरीही, पोलिस त्या रॅकेटचे इतर संबंध, पुरवठादार आणि संभाव्य ग्राहक कोण, याचा तपास वेगाने करत आहेत.
निवडणुकीपूर्वी गुन्हेगारीवर पोलिसांचा वचक
उपअधीक्षक सचिन थोरबोले यांनी सांगितले की,
“जत पोलिस ठाण्याची ही आतापर्यंतची सर्वात मोठी कारवाई आहे. निवडणुकीच्या पार्श्वभूमीवर शहरातील गुन्हेगारीवर कठोर वॉच ठेवला आहे. या तस्करीत आणखी कोण सहभागी आहे याचा तपास सुरू असून अशा गुन्हेगारीचा लवकरच बिमोड करण्यात येईल.”